அடுத்தடுத்து 2 வெற்றிகளைப் பெற்ற சிஎஸ்கே, ஈடன் கார்டன்ஸில் கேகேஆர் அணியை எதிர்கொண்டது. டாஸ் வென்ற கொல்கத்தா கேப்டன் நிதிஷ் ராணா முதலில் பந்துவீச்சைத் தேர்வு செய்தார்.

உமேஷ் யாதவ் சற்று மிரட்டலுடன் தொடங்கினாலும், ருதுராஜ் கெய்க்வாட், டெவான் கான்வே இணை பவர்பிளேயை அதிரடியுடன் நிறைவு செய்தது. கடைசி 2 ஓவர்களில் மட்டும் 28 ரன்கள் விளாசியதால், பவர் பிளே முடிவில் சிஎஸ்கே விக்கெட் இழப்பின்றி 59 ரன்கள் எடுத்தது. சுயாஷ் சர்மாவின் கூக்ளியைச் சரியாகக் கணிக்காத ருதுராஜ் 35 ரன்களுக்கு ஆட்டமிழந்தார். கான்வே, நடப்பு ஐபிஎல் பருவத்தில் தொடர்ந்து 4-வது அரை சதத்தை அடித்தார். 10 ஓவர்கள் முடிவில் 1 விக்கெட் இழப்புக்கு 94 ரன்கள் எனக் கடைசி 10 ஓவர்களில் சிக்ஸர் மழை பொழிவதற்கான அடித்தளம் சரியாக அமைக்கப்பட்டது. 56 ரன்கள் எடுத்த கான்வே, வருண் சக்ரவர்த்தி பந்தில் ஆட்டமிழந்தார். இங்கு தொடங்கியது கொல்கத்தாவின் சோகம்.

நடு ஓவர்களில் சுழற்பந்துவீச்சாளர்களை விளாசுவதற்காகவே அணியில் உள்ள ஷிவம் துபே, பாரபட்சம் பார்க்காமல் வந்தவுடனே வருண் சக்ரவர்த்தி ஓவரில் தொடர்ச்சியாக 2 சிக்ஸர்களைப் பறக்கவிட்டார். துபேவுக்குப் போட்டியாக உமேஷ் யாதவ் வீசிய அடுத்த ஓவரில் தொடர்ந்து 2 சிக்ஸர்களைப் பறக்கவிட்டார் ரஹானே. இந்த ஓவரில் மட்டும் சென்னைக்கு 22 ரன்கள் கிடைத்தன.

இதன்பிறகு, வானவேடிக்கைதான். இவர்களது அதிரடியைக் கொல்கத்தா பந்துவீச்சாளர்களால் கட்டுப்படுத்தவே முடியாமல் போனது. 24 பந்துகளில் அரை சதத்தை எட்டினார் ரஹானே. கெஜ்ரோலியா பந்தில் சிக்ஸரை விளாசிய துபே தனது வழக்கமான அதிரடியால் 20 பந்துகளில் அரைசதத்தை எட்டினார். ஆனால், துபே அடுத்த பந்திலேயே விக்கெட்டையும் பறிகொடுத்தார்.

அனைவரும் ஆச்சர்யப்படும் வகையில் ரஹானே தொடர்ந்து அதிரடியாக விளையாடினார். வருண் சக்ரவர்த்தி வீசிய 19-வது ஓவரில் தொடர்ந்து 2 சிக்ஸர்கள், 1 பவுண்டரி விளாச அந்த ஓவரில் 19 ரன்கள் கிடைத்தன. ஜடேஜா தன்பங்குக்குக் கடைசி ஓவரில் 2 சிக்ஸர்கள் அடித்தார். து அதிரடி காட்டினாலும், 4-வது பந்தில் ஆட்டமிழந்தார். ஜடேஜா ஆட்டமிழந்த பிறகு கடைசி 2 பந்துகளை எதிர்கொள்ள வந்த தோனி, ஃப்ரீஹிட் உள்பட 2 ஃபுல்டாஸ் பந்துகளையும் வீணடித்தார். சிஎஸ்கே 4 விக்கெட்டுகள் இழப்புக்கு 235 ரன்கள் சேர்த்தது. ஈடன் கார்டனஸ் மைதானத்தில் இதுவே அதிகபட்ச ஸ்கோர். கடைசி 2 ஓவர்களில் 36 ரன்கள் விளாசியதே இந்த சாதனைக்குக் காரணம். இறுதிவரை ஆட்டமிழக்காமல் இருந்த ரஹானே 29 பந்துகளில் 71 ரன்கள் எடுத்தார். ரஹானேவும் துபேவும் 3-வது விக்கெட்டுக்கு 32 பந்துகளில் 85 ரன்கள் எடுத்தார்கள். இருவரும் தலா 5 சிக்ஸர்கள் அடித்தார்கள்.

கடினமான இலக்குடன் கொல்கத்தா நைட் ரைட்ர்ஸ் அணி களமிறங்கியது. தொடக்க ஆட்டக்காரராக ஜெகதீசனுடன் சுனில் நரைன் களமிறங்கினார். ஃபீல்டிங்கின்போது காயம் ஏற்பட்டதன் காரணத்தினால், ஜேசன் ராய் களமிறங்கவில்லை.

சென்னையில் இம்பாக்ட் வீரராக அம்பதி ராயுடுவுக்குப் பதில் ஆகாஷ் சிங் களமிறங்கினார். முதல் ஓவரிலேயே ஸ்விங்கில் மிரட்டத் தொடங்கிய ஆகாஷ் சிங், நரைனின் ஆஃப் ஸ்டம்பைச் சிதறவிட்டார்.

துஷார் தேஷ்பாண்டே அடுத்த ஓவரில் ஜெகதீசனைக் காலி செய்தார். முதலிரண்டு ஓவர்களில் 2 விக்கெட்டுகள் விழுந்ததால், பந்துவீச்சாளர்கள் பக்கம் நெருக்கடியைத் திருப்ப முயன்று வெங்கடேஷ் ஐயரும், நிதிஷ் ராணாவும் பவுண்டரிகளை அடித்தனர். இருந்தபோதிலும், வெற்றி இலக்குக்குத் தேவையான ரன் ரேட் பவர் பிளேவில் கிடைக்கவில்லை. 6 ஓவர்கள் முடிவில் கொல்கத்தா 2 விக்கெட் இழப்புக்கு 38 ரன்கள் மட்டுமே எடுத்தது. சென்னையின் வெற்றி அப்போதே முடிவானது.

களத்தில் இரு இடக்கை பேட்டர்கள் இருந்ததால், மொயீன் அலியைப் பந்துவீச தோனி அழைத்தார். முதல் பந்திலேயே வெங்கடேஷ் ஐயர் விக்கெட்டை வீழ்த்தினார். 4-வது வீரராகக் களமிறங்கிய ஜேசன் ராய், இதே ஓவரின் கடைசி 3 பந்துகளை சிக்ஸருக்கு அனுப்பி லேசாக மிரட்டினார்.

கேப்டன் உள்பட அடுத்தடுத்து விக்கெட்டுகள் விழுந்ததால், ரன் ரேட்டில் சற்று மந்தநிலை ஏற்பட்டது. 10 ஓவர்கள் முடிவில் கொல்கத்தா அணி 4 விக்கெட் இழப்புக்கு 76 ரன்கள் எடுத்தது.

பவுண்டரிகள் அடித்தால் மட்டுமே வாய்ப்புண்டு என்பதை உணர்ந்த ராய், சிக்ஸரும் பவுண்டரியுமாக விளாசத் தொடங்கினார். 19 பந்துகளில் அரைசதத்தையும் எட்டி கொல்கத்தாவுக்கு நம்பிக்கையளித்தார். அடுத்தடுத்து இரு பவுண்டரிகள் அடித்த ராயை போல்ட் செய்து பழி தீர்த்தார் தீக்‌ஷனா. தோனியே இந்த விக்கெட்டைக் கொண்டாடினார்.

வெற்றிக்குத் தேவையான ரன் ரேட், ஓவருக்கு 20-ஐ நெருங்கியது. ரஸலை 9 ரன்களுக்கு ஆட்டமிழக்கச் செய்தார் பதிரனா. ரிங்கு சிங் மட்டும் தனியாகப் போராட, கொல்கத்தா வீரர்கள் வருவதும் போவதுமாக இருந்தார்கள். ரிங்கு சிங் மீண்டும் அரை சதம் அடித்தார். கொல்கத்தா அணி 20 ஓவர்களில் 8 விக்கெட் இழப்புக்கு 186 ரன்கள் எடுத்து சொந்த மண்ணில் தோற்றது. ரிங்கு சிங் ஆட்டமிழக்காமல் 33 பந்துகளில் 53 ரன்கள் எடுத்தார்.

புள்ளிகள் பட்டியலில் முதலிடத்துக்கு முன்னேறியுள்ள சிஎஸ்கே, எதை நோக்கிச் சென்று கொண்டிருக்கிறது?